بقلم : هيام الشهاوى : بطل من ورق

خيبت فيك كل الظنون
وانا وانت مش ممكن نكون
دالحب في شرعك كلام
والحب في شرعي قانون
شوف قد ايه انا حبي عاش
وبرغم بعدك ماانتهاش
عندى مشاعر م الخيال
عندي حاجات ماتحسهاش
حلمت بيك فارس جسور
يحميني من كل النسور
يسرقني من كل العيون
ويطير بي من فوق أعلي سور
صدقت قصه من الخيال
ووهمت نفسي بشيء محال
قصه انتهت وبقي السؤال
ليه البطل مابقاش بطل؟
وف أول القصه اتقتل؟
ياخساره كان عندي امل
انك تكون أغلى الرجال
لكن لقيتك من ورق
وف شدة الضوء اتحرق
وصحيت علي العمر اتسرق
واني صنعتك م الخيال
بقلمي هيام الشهاوي