الراجل ده دكتور فى كلية إعلام جامعة الأزهر
عنده مائدة رحمان فى المقاولون العرب طريق الأوتوستراد إسمها ( ساحة آل البيت ) ، مفتوحه من 8 الصبح ل 10 بالليل ( فطار – غدا – عشا ) طول السنه ببلاش والمائده لا تقبل تبرعات ماديه أو عينيه ، بقالها أكتر من 20 سنه قائمه على إطعام الطعام ، لا سيما فى شهر رمضان الكريم ، والأكل بها ( مشويات وأسماك وخير الطعام ) ده غير ال 12 فرع فى 12 محافظه .
ده طبعا غير ثقافته العاليه جدا وعلمه الغزير وطريقة شرحه السلسه وحبه للطلبه وتقديره لظروفهم.
الراجل دا كمان كل يوم ف الايام العاديه وهو داخل المحاضره ، بيدخل معاه عامل معاه شوال سندوتشات فول وطعميه ، وكرااتين بسكوت أولكر ، وعامل تانى صوانى عليها كوبايات شاى بالعشرات وبيوزع على الطلبه فى المحاضره ، الراجل ده بيعمل كده عشان الطلبه تلات أرباعهم بيبقوا جايين من سفر ومغتربين فبيبقوا لسه ما فطروش ، بيعمل كده من أول ما درس لغاية دلوقتى كل يوم بدون ملل او كسل أو استخسار .