شعاع : بقلم الشيماء. السوشيال ميديا والضغط اللي على الستات
زمان كنا بنقارن نفسنا بجارتنا وبنت خالتنا. دلوقتي بنقارن نفسنا بـ 1000 بنت من كل دول العالم في نفس اليوم.
السوشيال ميديا فتحت لنا شباك كبير على حياة الناس. بس المشكلة إن الشباك ده الإزاز بتاعه حاد، وبيجرح الستات الأول.
أولاً : فخ المقارنة اللي مبيخلصش
تفتحي انستجرام 5 دقايق تلاقي نفسك بعد ساعة بتسألي “هو أنا ليه مش كده؟”
جسم مثالي، بيت مترتب، شغل ناجح، علاقة رومانسية 24 ساعة. عقلنا بيصدق إن دي الحياة الطبيعية.
الرجالة مضغوطين في الفلوس والمكانة. واحنا مضغوطين في شكلنا وبيتنا وولادنا وجوازنا. الضغط علينا متعدد ومتكرر كل دقيقة.
ثانياً : الجواسيس اللي في موبايلنا
ودي أخطر نقطة.
تكوني متخانقة مع جوزك ومتضايقة. تتكلمي بصوت عالي وتفضي. تفتحي التيك توك تلاقي فجأة 20 فيديو: “الراجل اللي بيحبك هيعمل كذا” و “اوعي تتنازلي” و “فين حقك” و “انفصلي وعيشي حياتك”.
الخوارزميات بقت بتسمعنا. بتستغل لحظة ضعفنا وغضبنا وتولعها زيادة.
وفي الناحية التانية تلاقي فيديوهات تمثيلية لرجالة بيجيبوا هدايا وورد عشان تريند واللايكات. حاجة مالهاش علاقة بأي بيت حقي.
النتيجة؟ بيوت بتتكسر. ونسبة الطلاق عليت بشكل مرعب. عشان بقينا بناخد قرارات مصيرية من فيديو دقيقة.
ثالثاً : الكلام اللي بيوجع
السوشيال ادت مايك لأي حد. والهجوم على الست دايماً بيكون على شخصها وذاتها. مش على شغلها. وده بيكسر الثقة بالنفس حتة حتة لحد ما بنصدق الكلام ده.
رابعاً : وهم السوبر وومن
السوشيال بتبيع لنا منتج واحد: “لازم تكوني كل حاجة”.
أم مثالية بتطبخ أكل صحي، موظفة بتقفل التارجت، ست بيت شاطرة، شكلها جاهز 24 ساعة، وصاحبة جدعة كمان.
لما بنحاول ونفشل بنجلد نفسنا. وبننسى إن اللي بنشوفه ده متصور في أحسن 10 ثواني من يوم كامل مليان ضغط وتعب.
طب فين شعاع النور؟
الحل مش إننا نمسح كل حاجة. الحل إننا نبقى واعيين.
1. قفلي المايك : راجعي أذونات المايك والكاميرا للتطبيقات
2. نضفي الفيس بتاعك : أي صفحة بتخليكي تكرهي حياتك أو تحسي بالنقص اعملي بلوك فوراً
3. ارجعي للواقع : المشكلة مع جوزك حلها كلام بينكم مش فيديو. مفيش بيت كامل
4. اسألي نفسك: هو ده حقي ولا تمثيل عشان اللايكات؟
في الآخر السوشيال ميديا أداة. ممكن تكون نار تحرق بيتك. وممكن تكون نور ينورلك طريقك.
الاختيار في ايدك انتي.
قوليلي: إيه أكتر حاجة قررتي تبطلي تتفرجي عليها
